OBRADOIROS BIBLIOTECA CREATIVA

 Como sabedes a nosa biblioteca forma parte do Programa Bibliotecas Creativas que ten por obxecto apoiar a cultura da experimentación, a creación e a investigación, en espazos creativos e cooperativos no seo das bibliotecas escolares. 

Para levar a cabo as actividades do Proxecto recibimos dotación orzamentaria que neste curso escolar debería empregarse en obradoiros creativos para o alumnado.

Foron as monitoras e monitores de  e-makers Lab quen organizaron dúas xornadas de obradoiros simultáneos para todo o alumnado, con 4 estacións ben diferenciadas polas que ían rotando en pequenos grupos.

Carpinteiría, electrónica, robótica, realidade virtual, drones e coches teledirixidos con gafas especiais que fan que o piloto sinta coma se fose no coche que dirixe cos mandos... fixeron as ledicias de tod@s.

As monitoras e monitores fixeron gala dun moi bo "saber facer" e conquistaron a todo o alumnado. Unha marabillosa experiencia que agardamos tivese servido para espertar a curiosidade e/ou afición polo mundo maker.

OBRADOIRO DE DRONES

Aprenderon a pilotar un dron aéreo e outro terrestre. A través das gafas FPV puideron pilotar ambos drones en primeira persoa xa que levan unha cámara incorporada e @s compañeir@s visualizaron na pantalla o que estaba a ver @ piloto.

SECCIÓN INVENTOS

Facendo combinacións entre unha grande cantidade de sensores (luz, son, cor, presencia, distancia, tacto...) e actuadores (motores, luces, pantallas, altavoces...) construíron aparatos diferentes: timbre sen contacto, medidor de humidade, lámpara regulable...

EXPOSICIÓN DE OBXECTOS 3D

Variedade de obxectos impresos en 3D para coñecer a posibilidades que este recurso pode ofertar.

OBRADOIRO DE CARPINTEIRÍA

Traballaron coa máquina Playmake, obradoiro 4 en 1. Unha máquina que permite ter unha serra de calar totalmente segura para @s nen@s, un torno, taladro ou unha amoladora.

Traballaron co torno e coa serra de calar, facendo puzzles e pezas artísticas lixando e decorando o resultado.

XOGOS DE PROGRAMACIÓN E ROBÓTICA

De chan e con pequenos robots e actividades diferentes segundo a idade do alumnado.

EXPERIENCIA CON GAFAS DE REALIDADE VIRTUAL

Experiencia sorprendente de Grafiti en 3D.

Aquí tedes un resumo da xornada

En breve outro vídeo con todas as imaxes que tomamos durante os obradoiros para que disfrutedes de novo. De momento está na cociña e a cociñeira moi ocupada.